ఎర్రకోట బాంబు పేలుడు కేసులో కీలక ట్విస్ట్‌.. అసలు లక్ష్యం ఏమిటి ?

2025లో ఢిల్లీని ఉలిక్కిపడేలా చేసిన ఎర్రకోట సమీప బాంబు పేలుడు కేసులో జాతీయ దర్యాప్తు సంస్థ (NIA) కీలక వివరాలను వెల్లడించింది. ఎర్రకోట ఉగ్రవాదుల అసలు లక్ష్యం కాదని, ముందుగా మరో ప్రాంతాన్ని టార్గెట్‌ చేసినట్లు చార్జిషీట్‌లో పేర్కొన్నట్లు సమాచారం. ట్రాఫిక్ రద్దీ, కట్టుదిట్టమైన భద్రత కారణంగా చివరి నిమిషంలో దాడి ప్రణాళికను మార్చుకున్నట్లు దర్యాప్తులో తేలినట్లు పేర్కొంది.

అసలు లక్ష్యం లాల్ మందిర్?

2025 నవంబర్ 10న జరిగిన పేలుడు ఘటనపై దర్యాప్తు చేపట్టిన ఎన్‌ఐఏ.. కీలక ఆధారాలను కోర్టుకు సమర్పించినట్లు సమాచారం. దర్యాప్తు ప్రకారం, ఉగ్రవాదుల అసలు లక్ష్యం చాందినీ చౌక్‌లోని లాల్ మందిర్గా పేర్కొంది.

పేలుడు పదార్థాలతో నింపిన వాహనాన్ని మొదట లాల్ మందిర్‌ వైపు తీసుకెళ్లినట్లు సీసీటీవీ ఫుటేజీ ఆధారంగా గుర్తించినట్లు తెలిపింది. సాయంత్రం 6:37 గంటల సమయంలో వాహనాన్ని అక్కడ నిలిపేందుకు ప్రయత్నించినట్లు ఫుటేజీలో నమోదైందని పేర్కొంది.

అయితే ఆ ప్రాంతంలో భారీగా ట్రాఫిక్ ఉండటంతో పాటు భద్రతా ఏర్పాట్లు కట్టుదిట్టంగా ఉండటంతో అక్కడ దాడి చేయడం సాధ్యం కాలేదని దర్యాప్తు సంస్థ పేర్కొన్నట్లు సమాచారం.

ఎర్రకోట వైపు మళ్లిన వాహనం

లాల్ మందిర్‌ వద్ద ప్రణాళిక అమలు కాకపోవడంతో వాహనం ఎర్రకోట వైపు మళ్లినట్లు ఎన్‌ఐఏ చార్జిషీట్‌లో పేర్కొన్నట్లు సమాచారం.

సుమారు 13 నిమిషాల తర్వాత, సాయంత్రం 6:50 గంటలకు, ఎర్రకోట గేట్‌ నంబర్‌ 4 సమీపంలో వాహనం పేలినట్లు దర్యాప్తు వివరాలు వెల్లడిస్తున్నాయి. ఈ ఘటనలో 11 మంది ప్రాణాలు కోల్పోగా, 29 మంది గాయపడినట్లు పేర్కొంది.

డీఎన్‌ఏ, ఫోరెన్సిక్ ఆధారాలతో దర్యాప్తు

ఈ కేసులో ఘటనా స్థలంలో లభించిన ఫోరెన్సిక్, డీఎన్‌ఏ ఆధారాలు కీలకంగా మారినట్లు ఎన్‌ఐఏ తెలిపింది. శాస్త్రీయ ఆధారాలతో పాటు సీసీటీవీ ఫుటేజీని విశ్లేషించడం ద్వారా వాహనంలో ఉన్న ఆత్మాహుతి దాడికి పాల్పడిన వ్యక్తిని గుర్తించినట్లు చార్జిషీట్‌లో పేర్కొన్నట్లు సమాచారం.

అయితే ఇది దర్యాప్తులో ఒక భాగమేనని, పేలుడు వెనుక ఉన్న విస్తృత కుట్ర, ఇతర అనుబంధాలను వెలికితీసే దర్యాప్తు కొనసాగుతోందని అధికారులు పేర్కొన్నట్లు సమాచారం.

దాడి తర్వాత భద్రత కట్టుదిట్టం

ఎర్రకోట పేలుడు ఘటన అనంతరం ఢిల్లీతో పాటు దేశంలోని ఇతర ప్రధాన నగరాల్లో భద్రతా చర్యలను మరింత కట్టుదిట్టం చేశారు. ఇదిలా ఉండగా, ముందుగా లక్ష్యంగా చేసుకున్న ప్రాంతంలో భారీ ట్రాఫిక్‌, భద్రతా ఏర్పాట్ల కారణంగా దాడి ప్రణాళిక మారినట్లు దర్యాప్తులో వెల్లడైన అంశం ఇప్పుడు చర్చనీయాంశంగా మారింది.