దేశ భద్రతను బలోపేతం చేయడం లక్ష్యంగా కేంద్ర హోంశాఖ “ప్రహార్ (PRAHAR)” పేరుతో సమగ్ర ఉగ్రవాద నిరోధక విధానాన్ని రూపొందించింది. సీమాంతర ఉగ్రవాదం, సైబర్ దాడులు, డ్రోన్ల దుర్వినియోగం, ఆధునిక సాంకేతిక సవాళ్లను సమర్థవంతంగా ఎదుర్కొనే విధంగా ఈ పాలసీని రూపొందించారు.
కేవలం సరిహద్దు ఉగ్రవాదమే కాకుండా విదేశాల నుంచి జరుగుతున్న సైబర్ దాడులు, డిజిటల్ వేదికల ద్వారా జరిగే నేరాలను అడ్డుకునేందుకు ప్రత్యేక ప్రణాళికలను ఇందులో పొందుపరిచారు. కేంద్ర హోంశాఖ తన అధికారిక వెబ్సైట్లో ప్రహార్ విధాన పత్రాన్ని విడుదల చేసింది. ఉగ్రవాదాన్ని ఏ మతం, ప్రాంతం లేదా నాగరికతకు అన్వయించబోమని స్పష్టంగా పేర్కొంది.
స్పాన్సర్ టెర్రరిజం వల్ల భారత్పై ప్రభావం పడుతోందని, అల్ఖైదా, ఇస్లామిక్ స్టేట్ వంటి అంతర్జాతీయ ఉగ్ర సంస్థలు స్లీపర్ సెల్స్ ద్వారా యువతను ప్రభావితం చేయడానికి ప్రయత్నిస్తున్నాయని నివేదిక వెల్లడించింది. పంజాబ్, జమ్మూ-కాశ్మీర్ వంటి ప్రాంతాల్లో డ్రోన్ల ద్వారా అక్రమ కార్యకలాపాలు పెరుగుతున్నాయని కూడా పేర్కొన్నారు.
సైబర్ ఉగ్రవాదాన్ని ఎదుర్కొనేందుకు ప్రత్యేక సాంకేతిక వ్యూహాలను రూపొందించారు. దర్యాప్తు ప్రతి దశలో న్యాయ నిపుణుల సలహా తీసుకోవడం, ఎఫ్ఐఆర్లను బలంగా నమోదు చేయడం, యువతను ఉగ్ర సంస్థల ప్రభావం నుంచి రక్షించడం వంటి అంశాలకు ప్రాధాన్యం ఇచ్చారు. సమాజం, మతపెద్దలు, ఎన్జీవోలు కలిసి అవగాహన కార్యక్రమాలు నిర్వహించాల్సిన అవసరాన్ని కూడా సూచించారు.
ప్రహార్ విధానం ప్రకారం ఉగ్రవాదం ఒక బహుముఖ సవాలు. దీనిని ఎదుర్కొనేందుకు దేశీయంగా మాత్రమే కాకుండా అంతర్జాతీయ సహకారం, నిఘా సమాచార భాగస్వామ్యం, ప్రాంతీయ సమన్వయం అవసరమని పేర్కొంది.
అలాగే మానవ హక్కుల పరిరక్షణకు ప్రత్యేక ప్రాధాన్యం ఇస్తూ, ఉగ్రవాద నిరోధక చర్యలు చట్టబద్ధంగా మరియు పౌర స్వేచ్ఛలను గౌరవించే విధంగా అమలు చేయాలని స్పష్టం చేసింది.
- P – Prevention: ఉగ్రదాడులను ముందుగానే నివారించడం
- R – Response: వేగంగా మరియు సమర్థంగా స్పందించడం
- A – Aggregation: ప్రభుత్వ యంత్రాంగాన్ని సమన్వయం చేయడం
- H – Human Rights: మానవ హక్కులను పరిరక్షించడం
- A – Attenuating: రాడికలైజేషన్ను తగ్గించడం
- A – Aligning: అంతర్జాతీయ సహకారం పెంపొందించడం
- R – Recovery: సమాజాన్ని తిరిగి సాధారణ స్థితికి తీసుకురావడం
అధునాతన నిఘా వ్యవస్థలు, సాంకేతిక సామర్థ్యాలు, కమ్యూనిటీ భాగస్వామ్యంతో చురుకైన ఉగ్రవాద నిరోధక వ్యవస్థను నిర్మించడం ఈ విధానం ప్రధాన లక్ష్యం. మల్టీ ఏజెన్సీ సెంటర్, జాయింట్ టాస్క్ ఫోర్స్ ఆన్ ఇంటెలిజెన్స్ వంటి సంస్థల మధ్య సమన్వయంతో రియల్టైమ్ నిఘా వ్యవస్థ అమలు కానుంది.
సరిహద్దు ప్రాంతాల్లో భద్రతా దళాలకు సాంకేతిక నవీకరణలు అందించబడతాయి. స్థానిక పోలీసులు మొదటి స్పందన దళాలుగా పనిచేస్తూ, ఎన్ఐఏ మరియు రాష్ట్ర పోలీసు సంస్థలు ఉగ్రవాదాన్ని అరికట్టేందుకు కీలక పాత్ర పోషిస్తాయి.
