BMSRU ఆధ్వర్యంలో జెండా ఆవిష్కరణ, రక్తదాన శిబిరం – దేశాభివృద్ధిలో కార్మికులదే కీలక పాత్ర
పాలమూరు/కరీంనగర్, జూలై 23: దేశంలోనే అతిపెద్ద కార్మిక సంఘమైన భారతీయ మజ్దూర్ సంఘ్ (BMS) 72వ వ్యవస్థాపక దినోత్సవాన్ని పురస్కరించుకొని భారతీయ మెడికల్ అండ్ సేల్స్ రిప్రెసెంటేటివ్స్ యూనియన్ (BMSRU) ఆధ్వర్యంలో తెలంగాణలోని పలు ప్రాంతాల్లో ఘనంగా కార్యక్రమాలు నిర్వహించారు. పాలమూరులో జెండా ఆవిష్కరణ, రక్తదాన శిబిరం నిర్వహించగా, కరీంనగర్లో నిర్వహించిన కార్యక్రమంలో BMSRU రాష్ట్ర అధ్యక్షుడు పప్పుల సురేష్ ముఖ్య అతిథిగా పాల్గొని కార్మికులను ఉద్దేశించి ప్రసంగించారు.
పాలమూరులో పట్టణ ఆర్ఎస్ఎస్ కార్యాలయ ప్రాంగణంలో నిర్వహించిన కార్యక్రమంలో పెద్ద సంఖ్యలో BMSRU సభ్యులు, కార్యకర్తలు పాల్గొన్నారు. కార్యక్రమంలో భాగంగా స్వచ్ఛంద రక్తదాన శిబిరం నిర్వహించి పలువురు సభ్యులు రక్తదానం చేసి సేవాభావాన్ని చాటిచెప్పారు.
కరీంనగర్లోని అంబేద్కర్ నగర్ జంక్షన్ వద్ద నిర్వహించిన జెండా ఆవిష్కరణ కార్యక్రమంలో BMSRU రాష్ట్ర అధ్యక్షుడు పప్పుల సురేష్ సంఘ పతాకాన్ని ఆవిష్కరించి భారతీయ మజ్దూర్ సంఘ్ ఆశయాలు, సిద్ధాంతాలను సభ్యులకు వివరించారు.
ఈ సందర్భంగా ఆయన మాట్లాడుతూ, దేశ బలం కార్మికుల బలమేనని, ప్రతి కార్మికుడు దేశభక్తితో, అంకితభావంతో తన విధులను నిర్వర్తించినప్పుడే సమాజానికి అభివృద్ధి ఫలాలు అందుతాయని అన్నారు. దేశం, పరిశ్రమలు, కార్మికులు పరస్పర అనుసంధానమై ఉన్నాయని, దేశం అభివృద్ధి చెందితే పరిశ్రమలు అభివృద్ధి చెందుతాయని, దానితో పాటు కార్మికుల సంక్షేమం కూడా సాధ్యమవుతుందని పేర్కొన్నారు.
భారతీయ మజ్దూర్ సంఘ్ రాజకీయ పార్టీలకు అతీతంగా, స్వతంత్ర సిద్ధాంతాలతో పనిచేస్తూ ప్రపంచంలోనే అతిపెద్ద కార్మిక సంఘంగా ఎదిగిందని ఆయన తెలిపారు. అలాంటి గొప్ప కార్మిక సంఘంలో సభ్యులుగా ఉండటం ప్రతి కార్మికుడికి గర్వకారణమని అన్నారు.
పాలమూరు కార్యక్రమంలో BMSRU అధ్యక్షుడు సి. రాఘవేందర్ రెడ్డి, ఉపాధ్యక్షుడు శ్రీనివాస రాజు, కార్యదర్శి కరుణాకర్, కోశాధికారి రాఘవేందర్తో పాటు కమిటీ సభ్యులు మల్లేష్, చక్రపాణి, భాస్కర్ రెడ్డి, శ్రీకాంత్ రెడ్డి, అశోక్ యాదవ్, రంజిత్, ఉదయ్, రాజేష్, మద్దిలేటి తదితరులు పాల్గొని కార్యక్రమాన్ని విజయవంతం చేశారు.
కరీంనగర్ కార్యక్రమంలో BMS జిల్లా అధ్యక్షుడు పసుల శ్రవణ్, జిల్లా కార్యదర్శి తోర్తి శ్రీనివాస్, BMSRU జిల్లా నాయకులు అముదుర్తి రవి, క్యాతం శ్రీనివాస్, నల్ల నవీన్, గోవిందుల సతీష్, మాదాసు విక్రం, వెంకటరమణ, సుల్తాన్, నక్క అరుణ్ తదితరులు పాల్గొన్నారు.
ఈ సందర్భంగా కార్యక్రమానికి హాజరై విజయవంతం చేసిన సభ్యులందరికీ నిర్వాహకులు హృదయపూర్వక కృతజ్ఞతలు తెలిపారు. భారతీయ మజ్దూర్ సంఘ్ ఆశయాలు, సిద్ధాంతాలను మరింత బలోపేతం చేస్తూ, “దేశ హితం – కార్మిక హితం – పరిశ్రమ హితం” అనే ధ్యేయంతో కార్మికుల హక్కులు, సంక్షేమం కోసం ఐక్యంగా ముందుకు సాగాలని పిలుపునిచ్చారు.